> Zurück

Wider mau e Punkt!

Heller Naomi 13.02.2018

Am Sunntiabe si mir uf Konolfingen greist, nach zwöi Wuche ohni Training u mit der Hoffnig, ändlech mau wider chli z punkte. Mir si o sit langem zerscht Mau vollständig gsi, sogar di verletzti Liss isch cho luege.

Ide erste zwöi Sätz hei mir nid guet gspiut, u si drum nach nume knapp eire Stund 2:0 hinge gsi. Es het viune Orte ghapperet, mau weniger ir Defense, derfür meh im Agriff.

Im dritte Satz hei mer viu ufgholt u si plötzlech gäge Ändi knapp vore gsi. Imne Entscheidigskrimi heimer der Satz de für üs chönne entscheide u der Schwung i viert Satz mitgno. Dert isch aues gloffe u mir hei 25:21 gwunne.

Im füfte Satz het Konolfinge de nomau ufträit, sodass mer haut nur eine u nid zwöi Pünkt chöi heinä.

Das git iz aber Hoffnig für die nächste Matchs, drum gits es luuts Voitto!

 

Gspiut hei: Naomi, Nadine, Melike, Leila, Michèle, Melina, Joy u usghulfe hei no d Vivienne u d Steffi - merci öich!