Leider hets nid ganz glängt

VBC Studen – VOPAP

(25:23 / 25:17 /25:21)

Spielerinnen: Cesi, Claudia, Lea, Marcia, Martina, Michèle, Milena, Nicä K., Tanja

Coach: Andi

Am Samsti 9. Dezämber hei mir in Studen Uswärtsmatch gäge aktuell 2. Platziert vo üsere Gruppe gha. Ufem Hiwäg heimr no chli mitem Schnee z’Kämpfe gha, si aber trotzdäm aui pünktlech ir Haue gstande.

Es spannends Spiu uf höchem Niveau het üs erwartet. Dr erst Satz isch es Chopf a Chopf Renne gsi. Mau het Studen knapp gfüehrt, mau hei mir e chliine Vorsprung chönne usehole. Am Schluss hets leider knapp nid glängt und mir hei dr erst Satz mit 23:25 müesse abgäh. Zum zueluege e Top-Satz gsi!

Dr Andi (Coach vor 3. Liga B, hüt aus Coach bi üs igsprunge wüu Role und Yves nid ume si gsi) het aues gä für üs witer z’motiviere. Studen het es paar schöni Pünkt gmacht, wo mir trotz gueter Defensive nid hei chönne verhindere. I dene Momänte isches wichtig füre z’luege und nid nach jedem Punkt dr Chopf la hange. Mir hei o im 2. Satz kämpft, es hei sich aber einigi Fähler bi üs igschliche. Studen isch gly mau es paar Pünkt vorus gsi und het das gnützt für no chli mehr Risiko izgah und somit ou no meh Druck z’mache. Däm hei mir nüm chönne entgäge ha und so isch dr 2. Satz mit 25:17 äbefaus a Studen gange.

Verlore isch aber no nüt! Ou füre dritt Satz si mir no motiviert gsi und hei Siegeswille zeigt. Mir hei wider a üsi Leistig vom erste Satz chönne achnüpfe und es isch bis am Schluss spannend blibe. Ou dr Andi het mit Time-Outs und Spielerwächsle aues probiert zum dä Satz no hole. Glängt hets leider nid. Ou dr dritt Satz und somit dr Sieg het sich Studen ghout. (25:21)

Es isch es Top-Spiu gsi! Und es grosses Merci üsem Ersatzcoach Andi!

Am Samstig, 16. Dezämber 18:00 hei mir scho z’nächste Spiu. Es isch Heimrund im Altikofen ab 13:30 mit feinem Buffet und viune unterhautsame Spiu. chömet verbii! ?