Zurück
, Woehry Claudia

D4 - SIEG IM SPITZEKAMPF!

Hüt geits um d’Wurst! Spitzekampf isch agseit. Viu Vorfreud, chli Närvosität aber ou e gueti Portion Säubstvertroue bringe mir mit a dä Match. Mir si ready zum d’Spitze vor Tabäue z’erobere!

Samstag, 04.02.2023 – Vopap D4 – VBC Lyss (25:23 / 25:16 / 21:25 / 25:21)

Es startet wie erwartet mit hert umkämpfte Bäu. Beidi Teams si heiss und kämpfe um jede Bau – zum Teil unerträglech längi Bauwächsle si z’Resultat. Dänkbar knapp drum ou z’Satzresultat – 25:23 für üs! Dr Start is Spiu isch glückt.

Never change e winning Team – die gliche 6 gäbe ou im zwöite Satz Vougas. Mir chöi z’Niveau höch und d’Fählerquote töif bhaute, während bi Lyss grad chli dr Wurm drin isch. Gäge Endi vom Satz schint ou bi üs d’Luft e chli dusse z’si, Lyss cha no paar Pünkt verbueche, aber üse Vorsprung isch zum Glück so komfortabel, dass es das ma verlide. Ou dr zwöit Satz geit a üs.

So witerzieh und ou dr dritt Satz hole isch z’Ziel. E Spielerwächsu uf Dia söu no wider chli meh Energie ufs Fäud bringe. Aber es geit plötzlech nüm so ring. Lyss het wider chli Ufwind und macht plötzlech wider meh Druck. Mir kämpfe immer no guet, aber hinke rächt schnäu es paar Pünkt hingedrii. Ou e Wächsu churz vor Satzändi cha leider nüm verhindere, dass mir dr dritt Satz müesse abgäh. Haub so wiud, ou es 3:1 näme mir gärn.

Es chöme no einisch d’Start-6 zum Isatz. Dr Start im vierte Satz isch aber nid so glücklech – di erste 5 Pünkt gö a Lyss. Churz düreschnufe im Time-Out u nähr wider überzügt zrügg ufs Fäud go punkte. Gesagt, getan. Punkt für Punkt kämpfe mir üs zrügg und chöme bis uf 1 Punkt wider a Lyss häre. Bim Stand vo 18:19 nimmt Lyss s’zwöite Time-Out. Aber ou das bringt üs nüm usem Konzept und miteme Schlusspurt hole mir üs dä Sieg! D’Flingos hei widermau abgliferet und hei Tabäuefüehrig übernoh!