Zurück
, Woehry Claudia

D4: Schmerzliche Niederlage (scho wider die Wasener..)

Es isch hüt es speziells Spiel in Wasen: zum einte hei mir no e offeni Rächnig (im Hispiel hei mir 3:0 verlore) und zum andere isch es hüt z’letzte Spiel fürne längeri Zyt mit üsere Libera. Drum isch klar: hüt wei mir gwinne!

Und es faht guet a! Dr erst Satz hole mir scho fasch mitere Lockerheit. Es ma sogar es paar Fähler vo üsere Site verlide, wüu mir aber süsch starch ufspiele hole mir dä Satz doch dütlech mit 25:14. Mir si gwappnet, dass de da wahrschinlech no chli meh retour chunnt i de nächste Sätz.

Wasen isch gloub no nid 100% parat gsi im 1. Durchgang. Aber ou im zwöite Satz chöi mir vo Afang ah drvo zieh und erarbeite üs e komfortable Vorsprung. 21:12 si mir vorus, aber die letzte 4 Pünkt zum Satzgewinn si e Chrampf. Wasen isch itz so richtig im Spiu acho und machts üs z’Läbe schwär. Drum hole sie no paar Pünkt uf, am Schluss heissts de 25:20.

Mir si immer no uf Kurs und bereit im 3. Satz dr Sack zue z’tue. Aber Wasen het da öppis drgäge und het d’Strategie füre 3. Satz gänderet. Es isch itz eigentlech nüm 6 gäge 6, sondern eher 6 gäge 1. Aues louft über ihri stärksti Agrifferin. Wenns üs nid grad glingt sie z’blocke, de verteilt sie d’Bäll mit Power und Köpfchen so, dass mir meistens nume no chöi am Ball nacheluege. Mir halte aber wacker drgäge und chöi ou säuber es paar wunderschöni Pünkt verbueche. Vooooooopaap schlaht i Egge, Vopap schlaht i Egge – z’neuste Wärch vo üsem Choreogrüppli zur Melodie vo Petra Sturzenegger ;) Es längt aber leider nid ganz und mir müesse dä Satz knapp abgäh.

Im vierte Satz isch nähr komplett dr Wurm drin – i gloub mir si o eifach langsam gfrustet, dass üs immer die glichi Spielerin d’Bäu um d’Ohre hout. Leider schaffe mirs nid, dä Frust i positivi Energie umzwandle und stöh üs chli säuber im Wäg. Dä Satz geit viu zu dütlech a Wasen mit 25:14.

De wärdes haut hüt nume 2 Pünkt, ou ok. Dr Start im 5. Satz glingt üs und mir chöi mit 10:5 i Füehrig ga. Da sött ja itz eigentlech nüm viu passiere chönnt me meine. Dank däm, dass ihri Superwaffe itz wider vorne im Agriff isch, schafft Wasen aber tatsächlech no d’Wändi und gwinnt dä Satz mit 15:13. Zum dervoloufe! 

Noms, es tuet mir leid, dass mir dir nid chli e würdigere Abschluss hei chönne biete in sportlecher Hinsicht. Bhautisch lieber dr Match gäge Lyss in Erinnerig ;) Mir wärde di vermisse!