Zurück
, Woehry Claudia

D4: 2 Spiu – 10 Sätz – 3 Pünkt

A de letzte beide Samstige hei mir insgesamt 225 Minute lang kämpft um jede Bau. Bim Match Gäge Langethal heimr e spektakuläri & erfougrichi Ufhoujagd zeigt, gäge Aeschi isch es eher e chli z’Gägeteil gsi...

Samstag, 18.02.2023 – VBC Langenthal a – Vopap D4 (25:23 / 25:18 / 17:25 / 24:26 / 13:15)

Es Spiu, wo mir üs zersch mau no chli müesse finge. Es isch hüt z’erste Spiu mit dr Marcia als Libera und mir hei no nid wahnsinnig viu chönne trainiere i dere neue Konstellation. Aber mir si positivier Dinge, das chunnt scho guet. Es git no paar chlini Abstimmigsproblem, aber grundsätzlech starte mir guet i dä Match. E knappe erste Satz zu Gunste vo Langenthal. Im zwöite chöimr zersch i Füehrig ga, gäbe aber nähr z’viu Pünkt ab und chöi nüm ufhole. Ou e Wächsu churz vor Ändi Satz cha da nüt meh ändere.

Füre 3. Satz nomau e Wächsu und mir starte nomau bi Null. Mir wei hüt gwinne und zeige das ou i de Sätz 3, 4 und 5. Mit beidruckendem Kampfgeist und souveräner Leistig hole mir üs de doch no 2 Pünkt.

Merci a dere Stell no am Chris, fürs ispringe als Schiri im 1. Satz! 

Samstag, 25.02.2023 – Vopap D4 – VBC Aeschi (25:12 / 22:25 / 25:17 / 23:25 / 12:15)

Zmingst personell si mir hüt scho mau im Vorteil. Aeschi isch nume grad mit 6 Spielerinne agreist, üsi Ufgab: dr Gägner la seckle und müed mache.

Dr erst Satz louft rund, mir bringe üsi Leistig und vo Aeschi chunnt no grad nid so viu retour. E klari Sach für üs. Ou im zwöite Satz starte mir guet und hole üs e komfortable Vorsprung vo 7 Pünkt. Nachem erste Time-out vo Aeschi wändet sich aber plötzlech z’Blatt. E starchi Serviceserie vo Aeschi und es paar Unsicherheite uf üsere Site löh üse Vorsprung la schmilze. Ou üsi 2 Time-out und no e Spielerwächsu bringe üs nüt meh, Aeschi zieht verbi und holt sich dä Satz zu 22.

Im dritte Satz spiele mir nähr wider souverän so wie im erste. Mir chöme nie gross i Gfahr und sichere üs dä Satz mit 8 Pünkt Vorsprung. Itz eifach so witerfahre und dr Sack zue mache. Aber das wär ja viu z’eifach.. es isch sehr knapp i däm Satz, mau si mir chli vorus, mau Aeschi. Am Schluss het wie im 2. Satz Aeschi knapp d’Nase vore. Und im 5. Satz isch nähr bi üs gloub d’Luft scho chli dusse gsi. Mir starte schlächt. Aeschi hout sich e Vorsprung vo 8 Pünkt. Mir schaffe üs zwar no tapfer zrügg is Spiu und hole uf, aber es längt nüm ganz für häre z’cho. 15:12 für Aeschi im letzte Satz. Sie hei sichs verdient!