Di erschtu 3 Pinkt ver z Damu 2

Top motiviärt und vollzählig (abgseh fa Schwangerschaft und Üslandsüfenthalt) heiwer iisch am Samstag früähziitig im Altikofu gitroffu. Dr zweit Match und iischi erscht Heimrundi sind ufum Plan gstannu. Da heiwer de öi unbedingt wellu di erschtu 3 Pinkt holu - heiwer doch öi iischi Gägnerinnä fa Riggisbärg üs der Vorbereitig scho kennt.

Früähziitig siiwer da gsi, vor allum wäg dr lang und mit Spannig erwartut Garderobu-Red fa iischum Trainer. Di ganzu positivu Wort hennt de ihrusch Ziil öi nid verfählt. So is de nu vill motiviärter ind Halla gangu und wiär sii so richtig heiss gsi. Bim Iwermu het aber de trotz der gross Konzentration öi dr Spass nid tärfu fählu. So heiwer dr Marc mit dumnä chliinu Gscheich uf dr nöi Team-CD uberrascht ;)

Äs güäts Üfwermu, gfolgt famnä güätu Ischlah het de öi drzüä biigitreit, dasswer iisch richtig güät gfühlt und iisch so richtig uf das Spil gfröit hei. Nach derä letschtu churzu Asprach und dr nöi Begriässig is de öi scho los gangu.

Dr erscht Satz isch am Afang ziimlich nach iischum Gschmack gluffu. Wiär hei bald ämal äs paar Pinkt in Vorsprung chännu gah, vor allum öi durch druckvolli Service und güäti Agriffä. Da hennt iischi Gägnerinnä ver der erscht Mumänt nid gad vill entgäguzbringu kä (18:9). Plötzlich isch aber de äs liächts "Tiäf" üfgitöicht, was iisch de drzüä gizwungu het, iischi Gägnerinnä äs bitz meh la üfzschliässu. Dank dem grossu Vorsprung und dä letschtu wichtigu Pinkt heiwers aber de schlussändlich doch nu gschafft der Satz mit 25:16 ins Trochna z bringu.

Jetz hets gheissu: nur nid nahlah und d Konzentration hoch bhaltu. Isch aber nid immer so liächt gmacht wiä gseit. So is de passiärt, dasswer mit 5:10 inä Rückstand sii gratu. Äs Time-Out uf iischer Siita het aber de drzüä biigitreit, dasswer di paar Pinkt de dochnu hei chännu üfholu. Im Aschluss is de (vor allum öi wäg dä z villu Eigufähler) rächt üsgiglichu gsi. Iischi Gägnerinnä hennt iisch mit teilwiis besserä oder uberraschunderä Service und öi uberleiterä Agriffä ind Engi chännu triibu. Trotzdem heiwer iisch niä üfgigäh und de öi dr zweit Satz schlussändlich mit 25:22 ver iisch chännu entscheidu.

Im drittu Satz is de afangs öi wider ziimlich üsgiglichu gsi, bis de z Kati anä Service isch cho. Schii het de gad än chliini Serie chännu ileggu, was iisch öi widr zumnä güätu Vorsprung verholfu het. Iner Folg heiwer de öi im Agriff wider besser und meh chännu punktu und so hets de zum Schluss fa dem Satz gheissu: 25:18 ver iisch und somit öi di erschtu 3 Pinkt im Trochnu.

Alls in allum heiwer ziituwiis sehr güäti Phasä kä, gfolgt fa ziimlich durchzognä Mumäntä, wa mal widr nid so klar isch gsi, waswer da eigentlich gnau ver äs Spil spilä. Aber 3 Pinkt sind 3 Pinkt und das isch genau das, wawer brüüchä, gliich uf weli Art und Wiis wer di holä. Mit dumnä Sieg laht schich momentan gad rächt güät la läbu und git iisch hoffuntlich öi Üfschwung ver der negscht Match in zwei Wuchä am 14.11.15 an iischer zweit Heimrundi. Öi da würdiwer iisch am 18.00 uber villi Fans fröjiu.:)

Wiä immer an discher Stell:

Merci dä zahlriichu Fans wa iisch tatchräftig unnerstützt hennt! :)

Merci Marc ver diis Coaching, diini Motivation und diinä Glöibu an iisch! :)

Mit faner Partie sind gsi: Marc (Coach), Ursi (C), Phung (Libera), Kati, Martina, Eva, Steffi, Sarah, Monique, Natalija, Anja und Sandrine (C).