, Zeiter Sandrine

Üswärts-Bann gibrochu :)

Geschter Ämabu heiwer dr Wäg uf Interlaku gfunnu, ver am viertel vor 8i afa üfzwermu, izschlah und de am halbi 9i z startu. Bivor dass aber losgangu isch, heiwer iisch zu dr obligat Garderobured gitroffu. Da sind de nu di wichtigschtu taktischu Pinkt besprochu wordu. Wiär hei gwisst, dasses äs wichtigs Spil isch. Schliässlich sind d Frouä fa Bödli-Unterseen tabällumässig dicht hinner iisch gsi. Voll motiviärt siiwer de ind Halla gangu und hei agfangu ispilu. Nach dum Ischlah heiwer de, bivor dass losgangu isch, nu d Siita gwäxlut (ja, nach dum Ischlah).

Punkt halbi 9i is de losgangu. Wiär hei iisch üfgstellt, fescht mit dr Vorstellig, d erscht güät Anahm z schiäbu, än güätä Pass z spilu und am Agriff dr erscht Punkt z machu. Gseit, gmacht. De is de los gangu. Mit derä Serviceserie heiwer än super Start dargleit und plötzlich hets 8:0 ver iisch gheissu. Was ver än Start! Iischi Gägnerinnä hennt dr Mumänt nid gad vill z entgägnu kä. Wiär hei so druckvoll chännu serviäru, dass hüüfig d Bäll fa iischä Gägnerinnä nid all zu gfährlich sind zrugg cho. So hei wiär de im Agriff Punkt ver Punkt chännu zeigu, waswer chännä und hei sehr vill schöni diräkti Pinkt chännu verbüächu. So is de nid wiiter verwunderlich gsi, dass am Schluss fam erschtu Satz 25:13 ver iisch gheissu het.

Ver der zweit Satz hets de gheissu: ja nid nahlah odr iischi Gägnerinnä unnerschetzu. Schliässlich sind schii ja nid wägu nix ufum drittu Rang gsi. Wiär hei abr öi hiä ziimli güät chännu startu. S het zwar nimmä 8:0 gheissu, abr hei gliich mit 4 Pinkt Vorsprung chännu startu. Durch wunderschöni Agriffä und immer wider chliinerä Service-Seriä, heiwer der de immer wiiter chännu üsbuu. Das het de drzüä gfiährt, dass äs Ass faner Eva der zweit Satz beändut het und wiär denu mit 25:14 ver iisch hei chännu entscheidu.

Inä drittu siiwer de nimmä so güät gstartut. D Konzentration isch teilwiis nimmä so hoch gsi, was de drzüä gfiährt het, dasswer ziituwiis gad nimmä so gnau gwisst hei, uf weler Position wer eigentlich stäh unds äs bitz äs Durchänand gigäh het. Aber öi iischi Gägnerinnä sind um einiges besser in der Satz gstartut als nu vorer. So hennt schii zum Teil nu Bäll chännu üsgrabu, wa inä erschtu zwei Sätz so niä wäri zrugg cho. Das het de drzüä gfiährt, dasswer eigentlich immer meh odr weniger gliich üf sii gsi. Hei aber de gägu Schluss fam Satz widr äs Paar Pinkt Vorsprung chännu erarbeitu. Di sind aber de glich schnäller wäg gsi als gideicht. So is de am Schluss glich nu fascht knapp wordu. Aber äbu, nummu fascht. Wiär hei öi dr dritt Satz ver iisch chännu entscheidu, wenn öi nimmä ditlich: 25:23. 

 

Fazit: Ändlich heiwers also gschafft, und hei öi mal üswärts chännu gwinnu.:) Mit unglöiblichä 25 diräktä Pinkt im Agriff (!!) und 15 diräktä Pinkt im Service heiwer ditlich chännu zeigu, waswer eigentlich druf hei. Und hei iischä 3 mitgreistu Fans öi eppis chännu biätu ;) Üsserdem heiwer öi di taktischu Vorgabä fam Marc ziimli güät chännu umsetzu. Jetz is wichtig, dasswer di Form wiiter ziäh und wiiterhin so Freid am Spilu hei. Der negscht Match folgt de scho am Mäntag üswärts gägu TV Steffisburg.

 

Wiä immer:

Merci Marc ver diis super Coaching, und dasswer alli sii zum Isatz cho :)

Merci dä Fans wa sind mitgreist und iisch so unnerstützt hennt. :)

Merci dum Schidsrichter ver z Pfiffu :)

 

Mit faner Partie sind gsi: Marc (Coach), Ursi (C), Kati, Martina, Eva, Steffi, Sarah, Fibä, Monique, Natalija, Anja und Sandrine.