, Zeiter Sandrine

Ohni Wort

Am letschtu Samstag heiwer iisch zum erschtu Match nach dr Sicherig faner Teilnahm am Finalturniär in Riggisbärg gitroffu. Wiär alli sii eigentlich ziimlich uberziigt gsi, dass das än churzi Sach wird gäh, heiwer schi doch scho im Vorbereitigsspil und iner Vorrundi klar gschlagu. Wiär hei abr gwisst, dass schii iner letscht Ziit klar üfgidräit und öi andri Teams klar gschlagu hennt. Schlussändlich siiwer vellicht aber de doch äs bitzji z arrogant gsi...

Zerscht mal fa Afang a. Wiär heii isch pünktlich in Riggisbärg versammlut und sii nach derä churzu Garderobured öi ziimli motiviärt gsi. Wawer de ind Halla sii cho, isch z erscht mal iischers Spil um än Viertelstund verschobu wordu, will gad vorer nu än Match isch am löifu gsi. Güät ver iisch, de heiwer nu paar meh Minütä. Währund dum Ispilu isch d Stimmig relativ locker gsi und so isch de öi z eint odr anner Wort mit dä Gägnerinnä gwäxlut wordu. Denn is de um z Ischlah gangu. Und scho da isch irgendeppis komischs iner Luft glägu. Ich glöibu, äs isch der Mumänt eifacher gsi, di Bäll z zellu, wa iner anner Fäldsiita z Bodu sind gangu, als di, wa scho gar nid so wiit sind cho, odr meiluwiit ins Üs sind gsäglut. Abr ja, Ischlah und d Leischtig im Match chamu ja de doch nid immer 1 zu 1 uberträgu, schliässlich besteit Volleyball üs nu sehr vill meh als dum Agriff.

So heiwer iisch de üf gmacht, zum erschtu Satz. Churz nach dum Apfiff, het schich de gizeigt, dass mit dr Schidsrichterin nid z gspassu isch, het schii doch scho di zweit Ballberüährig fa iischä Gägnerinnä abgipfiffu. Alli sind ziimlich uberrascht gsi. Trotzdem heiwer iisch nid wellu la drus bringu, öi fa dä aschliässundu Kommentär nid, wa doch z eint oder anner Mal sind gfallu. Aber zrugg zum eigentlichu Spil: Was isch das gsi? Di miserabel Leischtig fam Ischlah, het schich leider öi währund dum Spil gizeigt. Ei Ball nach dum andru isch äntwäders im Netz oder näbu dr Siitulinia glandut. Äs het eifach nid wirkli vill funktioniärt. So is de nid wiiter verwunderlich gsi, hennt d Frouä fa Riggisbärg ihrusch Vorsprung chännu phaltu. Wiär hei de zwar öi dr eint oder anner schön Punkt chännu verbüächu, abr leider hennt d Eigufähler doch uberwogu und so isch dr erscht Satz mit 25:20 an iischi Gägnerinnä gangu.

Wiär hei iisch aber de nid wellu üs dr Rüäh la bringu, und hei de gfunnu, wiär spilägi jetz widr iischers Spil, und tiägä iischi Fählerquota reduziäru. Am Afang fam zweitu Satz isch iisch das ziimli güät glungu. Wiär hei vor allum im Service vill meh Druck chännu machu. So het z Kati mal widr än chliini Serie chännu startu und het iisch rächt schnäll zumnä grossu Vorsprung verholfu. Was aber de widr drum isch gangu, än schönä Üfbuu z machu, isch leider - wiä scho in Satz 1 - nimmä all zu vill gluffu, im Gägusatz zu iischä Gägnerinnä. Di hennt Punkt um Punkt gmacht und sind iisch immer neecher cho. Dank dum grossu Vorsprung fam Afang hets aber de am Schluss zum Glick doch nu glängt, wenn öi ganz knapp: 25:23 ver iisch.

Güät, wiär sii also doch nu da und gwillt, der Match z gwinnu. Leider het schich aber z Bild nid wirkli gändrut. Iischi Gägnerinnä sind immer besser ins Spil cho, und wiär hei ei Fähler nach dum andru gmacht. Das schön Spil, wawer inä letschtu paar Mätchä gizeigt hei, isch wiä verflogu gsi. Wiär hei nimmä wirkli all zu vill uf d Rejia gibrungu und hei de so dr dritt Satz klar mit 16:25 verloru.

Dr viärt Satz brüücht nid vill Wort: Dank dumä starchu Service faner Nr. 7 fa Riggisbärg und sinkender Moral und sinkundum Glöibu uf iischer Siita, isch das än churzi Sach und di gregscht Ohrufiiga in discher Saison gsi. Klarä Satz- und Matchgwinn ver Riggisbärg. 

 

Fazit: Wiär hei wirkli alli zämu än schwarzä Tag igfahru und hei iisch so öi nid wirkli gägusiitig chännu üfbuu. Aber äbu, liäber jetz, als de am 3. April. Ver iischi Moral is vellicht nid all zu förderlich gsi, aber dank dä Wort fam Marc am Schluss, heiwer iisch glöib doch äs bitzwiit chännu rehabilitiäru und sii umso gspannter und heisser uf iischers letscht Saisonspil am Fritag im Rain gägu Spiez. Schliässlich heiwer mit denu nu än Rächnig offu. Wiär würdi iisch öi da widr uber paar Züäschauer fröjiu ;)

 

Wiä immer:

Merci Marc ver diini üfbuundu Wort! Di sind sehr wichtig gsi! :) .

Merci iischä super Fans, wa öi ditz Mal widr bis uf Riggisbärg sind cho :)

Wiär gratuliärä dä Frouä fa Riggisbärg, wa mit dem Sieg ändgültig dr Ligaerhalt hennt gschafft!

 

Mit faner Partie sind gsi: Marc (Coach), Ursi (Captain), Nataljia, Kati, Sarah, Steffi, Eva, Monique, Fabienne, Martina und Sandrine.