Dame 2 mit dä erschtu 3 Pinkt :D

Vor dum Spil

Am Fritag isch iischi Meischterschaft ändlich losgangu. Wiär alli sii doch äs Bitzji nervös aber öi gspannt gsi uf das, was iisch iner 3. Liga erwartut. Wiär hei zwar iner Vorbereitig zwei Trainingsspil kä, wiä aber dr Formstand wirkli isch, gsehtmu de erscht, wenns um d Wurscht geit. Pünktlich heiwer iisch also im Rain zu iischum erschtu Heimspil gitroffu. Iischä Gägner: Volley Muri Bern. Uberraschund isch gsi, dass wiär mit 12 Spilerinnä dä 7 auf dr anner Siita zahlumässig uberlägu sii gsi. Das soll aber nu nix heissu, schliässlich zellt Qualität und nid Quantität. Bim Ischlah hets mi gidüücht, isch fa andrä Gägnerinnä öi scho meh cho, aber öi das soll nu nix heissu. Liächt agspannt aber öi voller Freid ischs de pünktlich am halbi 9i losgangu.

Dr 1. Satz

Am Afang fa dem Spil ischs uf beidä Siitä nu äs chliis Abtaschtu gsi. Wiär hei genau so chännu punktu wiä schii. Das het de drzüä gfiährt, dass schich d Punkteverteilig ziimli üsgiglichu gstaltut het. Mal einä ver schii, de widr ver iisch und immer so hin und här. Plötzlich het aber uf iischer Siita gad nimmä so vill funktioniärt und iischi Gägnerinnä hennt das chaltblüätig üsgnitzt. Punkt ver Punkt sind schii drfa gizogu. Das het de drzüä gfiährt, dass dr Vorsprung konstant bi 5 Pinkt glägu isch, ziituwiis aber nu meh agstigu isch. Jetz heissts widr konzentriäru. 100% gäh längt nid, wiär miässä meh, wiär wellä meh und wiär chännä meh. So hei öi wiär widr Punkt ver Punkt üfgholt. Nachemnä Time-out uf iischer Siita bim Stand fa 15:21 heiwer widr zrugg ins Spil gfunnu. Punkt ver Punkt heiwer iisch zrugg gikämpft und so d Gägnerinnä äbufalls zumnä Time-out bim Stand fa 21:19 üs ihrusch Sicht chännu zwingu. So is iner Ändphasa numal spannund wordu. D Üfholjagd het aber de doch nid ganz glängt und wiär hei dr erscht Satz mit 22:25 verloru.

Wiär hei aber gmerkt, dass da definitiv nu meh dri ligt! Iischi Üfholjagd het iisch de öi äs bitzji beflüglut.

Satz 2

So is de mit äs paar Wächslä uf verschidenä Positionä und nu meh Willu inä zweit Satz gangu. Plötzlich heiwer befriiter chännu spilu. Z Ataschtu isch verbii gsi und wiär mittlerwiilu iner 3. Liga acho. Ei Punkt nachem andru heiwer chännu erziilu. Siigs mit Druck am Service, dumnä Block zwischudurch, odr schönä Agriffä, heiwer iischi Gägnerinnä langsam ins Wanku gibrungu. Vor allum d Steffi het mit ihrusch unglöiblich Service-Serie iischi Gägnerinnä regelrächt üsänand gnu. Nid erstüünlich, siiwer de so relativ rasch drfa gizogu, dasses de plötzlich het gheisst: 11:6. Der Vorsprung heiwer iisch nid wellu la näh, sondern üsbuu. Das isch iisch de öi giglungu und so heiwer ziituwiis än Vorsprung fa 7 Pinkt üsagspilt. Iischi Gägnerinnä sind aber zäi gsi und hennt schich nid so schnäll wellu la abheichu. Das het de alls drzüä gfiährt, dass schii widr uf 3 Pinkt an iisch sind dra cho. Mit druckvollä Service heiwer iisch aber de widr chännu absetzu. Da hennt de öi Time-outs und Wächslä uf dr gägnerisch Siita nix chännu üsrichtu und am Schluss hets gheissu: 25:18 ver iisch. Das wäri also iischä erscht Satzgwinn iner 3. Liga gsi! :)

Dr dritt

Ei Satz längt iisch aber sicher nu nid. Wiär sii hungrig und wellä meh! Mit der gliich Üfstellig wiä im zweitu Satz siiwer inä drittu gstartut. Am Afang is widr losgangu wiä im erschtu. Än Punkt ver iisch, än Punkt ver Muri, immer so hin und här. Das tehnt zwar sehr banal, aber unner denu Pinkt sind alls andra als banali Pinkt drbii gsi. So hets ziituwiis Ballwächslä gigäh, wa uf beidä Siitä scho längschtens hätti miässu z Bodu gah. Abr sowohl wiär wiä öi schii, hei nid üfgigäh und hei alls nu gholt, wa irgendwiä z holu isch gsi. So lang, bis de än hertä Schlag ufd Netzkanta - mit aller Chraft wa nu gad da isch gsi - und äs Bitzji Glick dr Punktgwinn ver iisch beditut het. Mitti Satz isch aber de widr än liächtä Ibruch uf iischer Siita cho. Plötzlich het gad widr nimmä vill zämugstummu und wiär hei miässu züälüägu, wiä Muri Schritt ver Schritt drfa ziäht. Öi schii hennt ihrusch Vorsprung widr uf 5 Pinkt chännu üsbuu, bises üs iischer Sicht 10:15 gheissu. het. Ziit ver äs Time-out. Das het de öi dr nötig Erfolg gibrungu und wiär hei dr Abstand chännu verchürzu. Denn sind aber widr äs paar Pinkt in Serie uf ihrusch Konto gangu, dasses bi 18:22 widr zumnä Time-out isch cho. Di Situation heiwer scho fam erschtu Satz kennt. Ditz Mal heiwer iisch aber nid wellu la abheichu. Jedi fa iisch cha nu meh und müäss nu meh gäh. Wiär miässä präziser spilu, meh Druck machu und dr Rhythmus fa iischä Gägnerinnä brächu. So siiwer bis uf 21:22 neecher cho. Än Servicefähler uf iischer Siita het de di Üfholjagd churzziitig gibrämst. Will aber uf der anner Siita gad öi so einä gfolgt isch, heiwer numal d Chance kä mitem Service Druck zmachu. Und was ver än Druck da cho isch! Äs Aspil fam Ursi knapp uber d Netzkanta, so dass uf dr anner Siita gar kei Chance bestannu het, eppis drgägu üszrichtu. Fadugrad z Bodu und das zumnä wichtigu Ziitpunkt. Das het iisch allä numal Schub gigäh! Wiär hei de chännu üsglichu und sii sogar zumnä Satzball cho. Der erschtu heiwer aber nid chännu nützu. Abhaggu, und rüähig pliibu. Nutzäwer halt dr zweit! So is de öi gsi, und somit dr Satzgwinn mit 27:25 und dr erscht Punkt iner 3. Liga perfekt! :)

Dr Letscht :)

Ei Punkt, öi das längt iisch sicher nu nid. Wiär sii nid nur dra, oder chännä mithaltu, nei, wiär sii richtig güät und s git kei Grund, der Match nid z gwinnu. So siiwer de öi gstartut. Nach güätä Service heiwer scho gad am Afang paar Pinkt chännu machu. Aber öi uf ihrusch Siita sind de gad güäti cho und so ischs nach dum Minivorsprung widr üsgiglichu gsi. De isch de d Martina bi 10:10 anä Service cho. Nach 4 super Service het de Muri äs erschts Time-out gnu. Das het aber nid wirkli vill gnützt so dass de bim 10:17 üs ihrusch Sicht gad z zweita het miässu gnu wärdu. Das het de doch meh Wirkig gizeigt. Und Muri het üfgschlossu bis uf 15:17. S isch also numal spannund wordu. Denn heiwer aber de widr Service kä. D Spilerinnä uf dr Siita sind langsam nervös wordu. Mit güätä Service zum richtigu Ziitpunkt hets aber de nid wirkli än Grund drzüä gigäh. So hets bi 24:15 de öi gheissu: Matchball. Am Service hetmu aber de gad z vill wellu und dr churz Service isch leider zu churz gsi. Güät, de mächäwer halt nu än schönä Agriff. Und das isch iisch de öi giglückt und nach einer Stund und 37 Minütä hets gheissu, Vopap: 25, Muri Bern: 16 und somit Vopap: 3, Muri Bern: 1. Sieg und 3 Pinkt ver der Üfstiiger! :) Was ver än Freid, was ver än Start in di Saison :)

Fazit

Was ver än fulminantä Start in di Saison. Nach afänglicher Nervosität, heiwer zu iischer Sterchi zrugg gfunnu und hei der erscht Match iner 3. Liga ver iisch chännu entscheidu. Wiär sii zwar zwischudurch in alti Muschter zrugg kit, hei aber niä üfgigäh und chännä so iischi Siigesserie fam letschtu Jahr wiiterziäh. Wichtig isch, dasswer jetz aber nid uberhäblich wärdä, sondern wiiterhin konzentriärt pliibä. Wiär wissä, dasswer sicher nu meh chännä, als wer gizeigt hei.

Güäti Erholig isch jetz agseit. Schliässlich wird di negscht Wucha sehr intensiv. Ufum Plan stähnt: Cupmatch am Mäntag im Altikofe, äs Training am Zischtag, dr zweit Match am Donnschtag und äs ernöits Training am Fritag.

An discher Stell wiä immer:

Merci dä ganzu Züäschauer, wa iisch an dem Saisonstart unnerstützt hennt. :)

Merci Marc ver diini güätu Wort und diis Coaching.

Merci iischä zwei Schriiber und dum Schidsrichter.

Mit faner Partie sind gsi: Marc (Coach), Ursi (Captain), Kati, Martina, Noémi, Eva, Steffi, Maruschka, Sarah, Sandra, Monique, Anja und Sandrine.