Erstes Cup Spiu gäge VBC Thun

Am 19. Oktober hei mir üses erste Cup Spiu gäge VBC Thun gha. Mir hei gwüsst, dass si es U23 3 Team si, hei drum zimlech höchi Erwartige a üs gha und es isch klar gsi, dass mir dä Sieg wie mit hei nä!

Da di momentan einzigi Passeuse isch usgfaue isch üs zum Glück t Melike vom U23 B cho ushäufe – a dere Steu: Danke viu mau! So si mer es bitzli zämegwürflet und leider no nid so guet ufenang abgstumme ufem Fäud gstange und hei zimlech schnäu müesse feststeue, dass mir üsi Gägnerinne ungerschetzt hei.

Mit däm hei mir nid grächnet gha und si i Rückstang cho. Gäge Schluss vom erste Satz und nachemne Timeout vor Sandrine hei mir aber zum Glück no chönne punkte und der erst Satz doch no mit 28:26 chönne gwinne!

Im zwöite Satz heimer de vo Afang a me Druck chönne mache. Doch ou Thun isch stercher worde. Wider isches äng worde, aber schlussändlech hei mir ou der zwöit Satz mit 25:23 für üs chönne entscheide!

Im dritte Satz si mir am VBC Thun klar überläge gsi und hei z Spiu mit 25:13 chönne abschliesse!