1. Match VBC Lyss vs. Volley Papiermühli Damen 3. Liga A

Acho in Lyss und voll fokussiert dr erschti Match z'risse, hämr eus körperlich und mental uf dä Match vorbereitet. Mir händ welle zeige was mr in dä letschte Mönet erlernt händ und das so guet wiä möglich welle umsetzä in eusem erschte Spil.

Nacheme liicht verschlofene Start im erschte Satz, hämr uns Punkt für Punkt an eusi füehrende Gegnerinne anekämpft. Mitere guete und solide Gegewähr hämr im Ändeffäkt dr erschti Satz für eus chöne entscheide, yes! Im zwöite Satz ischs denn turbulänter zue und här gangä, huiuiuiii! Noch divärse Meinigsverschideheite mit em Schidsrichter sind d'Emotione ufem Höhepunkt aaglangt. Somit isch dr Fokus nüm ufem Spiel glägä, sondern eusi Gmüeter widr z'beruhige. Eusi Gegnerinne als au s'Heimpublikum händ das notürlich usgnützt. Trotzdessä, hämr eus gwehrt und si no nööch anä cho. Schlussändlich ischs denn bimene 25:23 für Lyss blibä.

Im dritte Satz simr denn gar nüm binenand gsi und mir händ müeh gha Bäll abzwehre und äs guets Spil ufzbauä. Nochem dritte Satz isch fertig gsi mit luschtig! Mir händ zu eusr mentale und spilerische Stärki zrugg gfunde und händ Punkt für Punkt chönä erziilä. Mir händ eusi Gegner zuenähmend chönä unter Druck setzä und jedi Gegewähr het nä nüt brocht. D'Freud im Spiel isch widr zrugg cho und dr Kampfgeischt isch widr gweckt worde.

Im fünfte Satz hämr denn dr Sack zuegmacht! Mit gnueg Sälbschtvertrauä und Teamspirit hämr das Ding für eus chönä entscheide miteme Ändresultat vo 15:7.