, Flumene Ursula

Erste Sieg ir Rückrundi und was für eine!!

Nach ere witere Niederlag letscht Wuche gäge VBC Thun si mir ir Rangliste uf e 5. Platz gheit und üses Sälbstbewusstsi grad mit.

Um no Schlimmeres abzwände het de dr Andi im Training e rächt klari Asag gmacht füre Match gäge Strättlige! So hei mir de am Fritig ou es super Training gha und üs vollzählig uf das Spiel vorbereitet.

Leider si de churzfristig d Anja und d Sandra krankheitshalber usgfalle. So simer chlei dezimiert, aber voll motiviert scho früeh ir Halle xi und hei üs warm gmacht für das Spiel gäge altbekannt Gegner us Thun.  

Dr erscht Satz

Mir si guet gstartet, hei dr Gägner mit üsne Service und Agriffe unter Druck gsetzt und si schnäu mal in Füehrig gange. Scho bi 8:3 für üs het dr Gägner ds erste Timeout müesse näh. Gnützt hets ne nüt, mir si unbeirrt witerzoge und hei dä Satz mit 25:19 für üs chönne entscheide.

Scho hie hei mir e tolli Teamleistig zeigt. Trotzdem isch hie sicher d Martina z'erwähne, wo e wahnsinnige Lauf het gha und vieli wichtigi Pünkt het gmacht!  

No dütlecher im zwöite

Was wott me da no derzue säge?! In 21 Minute und mit 16:25 hei mir ou dä Satz klar chönne gwinne. Vo Afang a si mir wieder i Füehrig gange, hei em Gägner üses Spiel ufzwunge und - was für üs eher speziell isch - mir hei’s nümme us dr Hand gäh. E herrlechi Stimmig ufem und näbem Feld!  

Dr dritt…

… sig ja immer dr schwierigst. Und das het me am Anfang vo däm Satz ou chönne meine. Strättlige isch zum erste Mal i däm Spiel vorus gsi. Ou ds erschte Timeout bi 7:9 het nid die gwünschti Würkig zeigt. Mir si aber ruehig blibe und hei die gueti Stimmig chönne ufrächterhalte, hei fokussiert witerkämpft und ab Mitti vom Satz wieder chönne ufhole. Bi 20:20 isch de i däm Spiel doch no rächt Spannig ufcho. Mir hei dä Satz eifach wöue gwinne! U so hei mir de nomal ufdräiht und Punkt für Punkt chönne erziele. Mit 25:21 hei mir ou dä Satz gwunne und 3 witeri, sehr wichtigi Pünkt gholt!  

 

Was für e Teamleistig Froue! Es isch eifach super gsi :-) Genau die Stimmig und dä Biss het üs i de letschtä Spiel gfählt. Jetze wüsse mir wieder, wie gwinne geit und zieh grad witer eso!

Es grosses Merci hie sicher a Andi, wo üs wieder het wachgrüttlet und üs dütlech klargmacht het, was üses Ziel isch!

Merci üsne treue Fans und Zueschouer – dir sit super gsi!  

 

Am Sieg beteiliget si gsi: Andi (Coach), Sandrine, Monique, Eva, Martina, Steffi, Noémi, Sarah, Maruschka, Ursi