U23A: Niederlag gägä VC Uettlige

Am Samsti hei mir a üsem Heimspiu gäge VC Uettlige e schwirigi Usgangslag gha. Da d U19 gliichzitig het gspiut, hei mir ohni üsi U19-Spilerinne müesse starte. D Sara vor U23B isch üs cho unterstütze (danke Sara!), trotzdem het d Michèle, wo eigentlech Usse isch, müesse Mitti spile, u d Joelle het ihre erst Match nach langer Verletzigspouse gha u scho grad müesse dürespile.

Mir hei üs gliich chli ne bessere Start erhofft gha: der erst Satz isch vor auem wäge schlächte Anahme bim starche Service vo eire Gägnerin grad mit 12:25 verlore gange. Leider hei mir o der zwöit Satz verlore, obwou mir üs dert hei chönne zämenäh und gäge Ändi vom Satz nach Inputs vom Clöidi o wider hei usgseh aus hättemer ou Fröid am Volleyball spiele. :-) Im dritte Satz aber hei mer de richtig Fröid gha u mit viu Kampfgeischt der Satz de o mit 25:23 für üs chönne entscheide.

Di positivi Energie het leider gliich nid ganz für füf Sätz glängt, da mir im vierte Satz wider chli abgsacket si, so dass mir dä Match 1:3 hei verlore. Obwohl’s bis iz sicher nid üse best Match isch gsi, löh mir aber ize der Chopf nid la hange u fröie üs umso meh, am Friti gäge Lyss de wider chönne z zeige, was mir chöi! Mir wärde versueche, dini Närve chli weniger z beaspruche Clöidi, versproche! ??

Voitto!

Gspiut hei: Vanessa, Michèle, Nadine, Melike, Leila, Joelle, Naomi und d Sara vor U23B