3:0 Sieg oh wow- Spiel eher mau

Top motiviert isch ds Dame 4 i die nächschti Rundi gange, dahei, und dismau mitem Coach Timo, und mit dr lang verletzte Mittispielerin Aline, olé! Schaffe mir zum dritte Mal nachenang e 3:0 Sieg?

Dr Gegner (Steffisburg) isch i dä hingere Räng, hett aber ir Rückrundi ufdreht und gege starki Gegner chönne punkte.

Aber statt es olé isches eher es ojemine, mir spiele komischs Volleyball und lö üs dür die ungwohnte Bäll vom Gegner la drusbringe. Es chöme vili Gratisbäll, wo mir aber nid zu üsem Vorteil chöi nütze. O mit dr Kommunikation ungerenang happerets. Zum Glück und trotz auem si mir die besseri Mannschaft und punkte mit üsem Service und dä Agriff. Erstuunlicherwiis hei mir dä Satz trotzem «Knorz» mit 25:15 im Sack.

Dr 2. Satz isch de aber leider nid besser und mir si am Afang im hingerligse, mir hole aber uf und gwinne doch noch mit 25:18, uff!

Leider isches o dr letscht Satz es Uf und Ab, und schussendlich si mer einfach nume froh findet das Spiel es Endi, mit 25 zu 17 zu üsne Gunschte.

Schinbar gsehts vo usse nid soo schlimm us (Feedback Zueschauer), aber mir selber wüsse: das chöi mir definitv viu besser!

Mit dere mässige Leischtig hei mir de sicher nicht immer Glück: die nächschti gegnerische Mannschaft (Grosshöchstetten) isch heiss ufene Sieg und wott sich de sicher für ihri 3:0 Heimiederlage revanchiere!