Erfougrichä Mäntigabä, dank superstarcher Teamleischtig ;)

Erfougrichä Mäntigabä, dank superstarcher Teamleischtig ;)

 Am Mäntigabä hei mir drü wichtigi Pünkt ghout u sy itz ufem vierte Platz!

 Volleyball Papiermühle - VBC Grosshöchstetten 3:1 (25:22 / 25:16 / 19:25 / 25:21)

Satz: Im erschte Satz hei mir zersch chli müesse i Flow cho. Bim Ispielä het säch leider üsi Aya verletzt, aber sie isch im Verlouf vom erschte Satz nähr glich inächo. Mir hei extrem kämpft u hei 25:22 gwunnä.

Satz: Im zwöitä Satz sy mir durch ds Band im Flow gsy u hei am Gägner mit 25:16 nid viu Ruum gla.

Satz: Im dritte Satz sy mir de glich chli nervös worde u hei 19:25 verlorä.

Satz: Dr Start i viert Satz isch üs nid gad glungä. Aber dank dr sehr starche Teamleischtig, hei mir äs 4:14 ufhout u hei dr Sack mit 25:21 zue gmacht. D'Fröid isch riesig gsy!!!

Z'erwähne sy no fougendi wichtigi Pünkt:

Aui Spielerinne dussä hei vougass gäh mit Afürä!

Üses Glückstape, wo mir itz syt vier Mätche achläbä (die meiste am Finger, anderi aber o unger dä Schohner), bringt aso würklech Glück.

Trotz Verletzig bim Iloufä, isch üsi Aya definitiv üsi Punktechünigin gsy.

D Conä het d Bäu super verteilt u so dr Block chönnä usänangzieh.

D’Sase u d’Ana hei super verteidiget.

D’Trix het üse Gägner mental usägforderet.

Ei Fan am Spielrand het üs super agfüret u isch itz o üsä erwähut Fotograf 😊

Äs riesegrosses MERCI a üse Coach Timo, wo mägnisch o chli viu Närvä mit üs brucht!!!